Обвинителството: Ќе докажеме институционална и морална распаднатост во ЕСМ, наместо чесно да ја вратат довербата тие ја злоупотребиле функцијата!
„Ќе докажеме и институционална и морална распаднатост во ЕСМ“, изјави обвинителката Наташа Поп Трајков во воведниот говор на судењето за т.н. предмет „Адитив“, кое се одвива во дигиталната судница во КПУ Идризово.
„Обвинителството со докази ќе покаже дека пред нас стои злосторничко здружување на кое државата му доверила еден од најважните системи – производството на електрична енергија. Наместо чесно да ја вратат довербата на државата која ги наградувала високо и финансиски, тие ја злоупотребиле својата положба за лично збогатување“, нагласи Поп Трајков.
Според обвинението, 31 физичко и 5 правни лица, меѓу кои и високи функционери во енергетскиот сектор, се товарат за злоупотреба на јавни набавки и перење пари во врска со набавката на адитиви за јаглен за потребите на АД ЕСМ – Подружница РЕК Битола и РЕК Осломеј.
Во периодот од април до август 2023 година, обвинетите – некои како организатори, други како соучесници – создале и делувале како група со цел да го изиграат системот за јавни набавки. Според обвинението, тие договарале пререгистрации на фирми, манипулирале со тендерските процедури и овозможиле едно правно лице да го добие договорот за набавка на адитиви вреден речиси 397 милиони денари, додека преку разни трансакции во готовина и преноси на средства, прикриле повеќе од 414 милиони денари стекнати со кривично дело.
Првообвинетиот Васко Ковачевски, поранешен директор на ЕСМ, не беше присутен на рочиштето – судот донесе решение да му се суди во отсуство.
Случајот „Адитив“ се смета за едно од најзначајните и најобемни обвиненија во поновата правосудна историја на земјава, со потенцијални последици не само за правосудството, туку и за јавното доверие во управувањето со државните ресурси.
