ОБВИНИТЕЛСТВОТО БАРА КУЌЕН ПРИТВОР ЗА ТАТКО И СИН ОД ГЕВГЕЛИСКО Осомничени се за илегална трговија со канабис
Обвинителството во Гевгелија почна истражна постапка против две лица, татко и син од гевгелиското село Богородица, за кои постои основано сомнение дека сториле кривично дело Неовластено производство и пуштање во промет наркотични дроги, психотропни супстанции и прекурсори од член 215 став 1 од Кривичниот законик.
„При претрес со судска наредба во домот на осомничениот татко на 17 декември биле откриени околу 150 грама марихуана во разни пакувања, семки од канабис, метални и пластични грендери, две дигитални ваги, три бонга, како и шатор со електрична инсталација, светилки, ламби и мерачи на температура кои служеле за претходно производство на канабис“, соопшти Јавното обвинителство.
Осомничениот син, пак, посредувал во купопродажбата на марихуаната, се додава во соопштението.
„Дрогата која ја зел од неговиот татко со намера да ја препродаде, ја однел во куќата на дедо му каде престојувал. Кога полициските службеници отишле и таму да вршат претрес, тој ја заклучил влезната врата, ја фрлил во ВЦ шолјата и пуштил вода, а се обидел да се ослободи и од дигитална вага со остатоци од дрога. Бидејќи постојат околности кои го оправдуваат стравот дека осомничените ќе се дадат во бегство или дека ќе ја попречуваат кривичната постапка со влијание врз сведоците на кривичното дело јавниот обвинител до судијата на претходна постапка во Гевгелија достави предлог за определување мерка куќен притвор, како и дополнителна мерка на претпазливост – привремено одземање на патните исправи“, соопшти Јавното обвинителство.
.
