Обвинители од организиран криминал влегоа во АНБ, почнува увидот во документацијата за прислушувањето
Основното јавно обвинителство за гонење на организиран криминал и корупција (ОЈО ГОКК) и официјално ја започна предистражната постапка за скандалот со наводното незаконско следење на комуникациите. Тим истражители од Обвинителството денеска влегоа во просториите на Агенцијата за национална безбедност (АНБ) за да договорат увид во документацијата поврзана со случајот.
Како што соопштија од ОЈО ГОКК, на средбата била договорена динамиката за спроведување на увидот во обемната и сензитивна документација со која располага АНБ, а која се однесува на известувањата за можни злоупотреби доставени до Обвинителството.
„Во рамките на денешниот работен ден двете институции демонстрираа коректен и професионален однос во насока на ефикасно спроведување на законските надлежности и заштитата на јавниот интерес“, се вели во соопштението.
Од Обвинителството нагласуваат дека увидот ќе трае во наредниот период, бидејќи станува збор за доверливи документи врз основа на кои треба да се обезбедат релевантни докази, а најавуваат и преземање на други предистражни дејствија.
Поради тајноста на предистражната постапка, ОЈО ГОКК упати апел до медиумите и јавноста да се воздржат од прерано изнесување на заклучоци додека трае постапката и не се утврдат фактите.
„ОЈО ГОКК постапува исклучиво врз основа на докази, во рамките на законските процедури и со целосно почитување на правата на сите засегнати страни. Навремено ќе ја информираме јавноста за текот на постапката тогаш кога споделените информации нема да ја загрозат тајноста на предистражните дејствија“, порачуваат од Обвинителството.
