Обрадовиќ: Ова е страшно – дете ни го плукаше автобусот, а мајка му се смееше!

Легендарниот тренер не можеше да сфати што се случило во последните три децении во кои од речиси заедничко славење на кошарката на дерби пресметките на кои бил како играч, дошло до смртна омраза помеѓу фановите на двата тима.

„Пред некој ден го гледав финалето помеѓу Партизан и Ц. Звезда од 1987 година во кое учествував како играч, на кое имаше навивачи на двата тима, кои буквално заедно скандираа и се радуваа. Луѓе мои, што ни се случи низ годините за да имаме ваков хаос во 2023 година. Па дете, кое со родителите за рака се движи кон салата, одеднаш почнува да плука кон нашиот автобус, додека мајка му го гледа и се смее. Не ми се веруваше. Сакам да збориме за кошарка, а не за тоа кој кого удрил и што паднало на теренот и кој фрлил. Се молам да дојде време да се пишува само за кошаркарите и нивните мајстории. Кој е тој што сее омраза, тоа е прашање на сите прашања. Тоа е се од мене, навистина немам што друго да кажам“, изјави Обрадовиќ и си замина.

Петтата средба од финалето е закажана за задутре, а домаќин е Партизан и ќе се игра во „Штарк арена“ пред околу 20.000 навивачи на црно-белите.