Новите кратења на Трамп: Ги стави медиумите на црна листа – еве кому сè му ја укинува претплатата
Владата има право да ја откаже секоја претплата што сака. Но, агенциите и канцелариите сега ќе знаат многу помалку за тоа што се случува во светот. Тешко е да се види како тоа ќе биде од корист за жителите на САД – вели портпаролот на Њујорк Тајмс, Чарли Стадландер.
Американскиот Стејт департмент денеска нареди суспензија на сите медиумски претплати како дел од обидот на владата да ги намали трошоците во јавниот сектор. Претседателот Доналд Трамп го избра милијардерот Илон Маск да раководи со владиниот тим за намалување на трошоците наречен ДОГЕ, кој сега спроведува ревизии на федералните агенции кои бараат начини за намалување на трошоците. Стејт департментот соопшти дека ги суспендирал сите „медиумски претплати освен академски или професионални списанија“, без да открие колку долго ќе трае паузата.
Американскиот државен секретар Марко Рубио, првиот човек на Стејт департментот, рече дека сите трошоци во јавниот сектор мора да бидат усогласени со приоритетите на Трамп „Америка на прво место“. „Вашингтон пост“, кој прв ја објави суспензијата во средата, цитираше наводен меморандум од агенцијата во кој ги повикува вработените да ги прекинат договорите со Економист, Њујорк Тајмс, Политико, Блумберг, Асошиетед прес и Ројтерс, меѓу другите. Портпаролот на Њујорк Тајмс, Чарли Стадландер, рече дека „јавните службеници, како и Американците во приватниот сектор, имаат потреба од веродостојни информации за да ја завршат својата работа“. „Се разбира, владата има право да ја откаже секоја претплата што сака. Но, главниот резултат од ставањето на црната листа на независни медиуми е дека овие агенции и канцеларии сега ќе знаат многу помалку за тоа што се случува во светот. Тешко е да се види како тоа ќе биде од корист за жителите на САД“, додаде тој.
