Новиот лидер на Сириза стапи во геј-брак со својот партнер во Њујорк
Новиот лидер на грчката левичарска партија Сириза, Стефанос Каселакис, денеска во Њујорк стапи во геј-брак со својот партнер Тајлер Макбет.
Наследникот на Алексис Ципрас во Сириза, кој е првиот геј лидер на политичка партија во Грција, беше изненадувачки избран за шеф на левичарската опозициска партија на крајот на септември.
Новодојденецот во политиката и грчката јавна сцена, Каселакис (35), бизнисмен и поранешен трговец на Голдман Сакс, изминатиот период пред јавноста веќе го претстави својот партнер, Американец кој работи во службата за брза помош.
Денеска објавена е причината за ненадејната посета на Стефанос Каселакис, новоизбраниот лидер на СИРИЗА на Њујорк, пишува грчкиот весник „Прото тема“. Објавено е дека Каселакис ги информирал високите функционери на опозициската партија за неговата венчавка што се одржува денеска, потврдија од Политичкиот секретаријат на СИРИЗА.
Бројни грчки медиуми ја потврдија оваа вест, а целата партија СИРИЗА ги упати своите најдобри желби на парот.
Понатаму, откриено е дека Стефанос Каселакис и неговиот партнер Тајлер Макбет моментално престојуваат во викендица во Њујорк, која заеднички ја поседуваат, како што информираат извори од Кумундору (седиште на СИРИЗА).
