НОВИНАРОТ ГОРАН МОМИРОСКИ НАЈДЕ ДОМАТИ ОД 279 ДЕНАРИ – не се почитува владината одлука за замрзнати цени

Новинарот Горан Момироски објави фотографија од еден продажен објект во Скопје, на кој може да се види дека таму домати се продаваат по 279 денари за килограм.

„Не забележав точно ама мислам дека патлиџаните се набавени со таен договор преку Бехтел и Енка, а национален координатор на набавката бил вториот премиер Аркан Мазни“, пишува новинарот на својот фејсбук профил.

Инаку, Владата, на својата вчерашна седница, донесе Oдлука со која се утврдува цена во висина: до 95 денари за  килограм свежи домати, до 95 денари за  килограм свежи краставици, до 70  денари за  килограм кромид, до 100 денари за килограм свежи зелени пиперки, до 95  денари  за  килограм грав, до 110  денари за  килограм леќа, до 75  денари за  килограм банани, до 60  денари за  килограм портокали, до 65  денари  за  килограм мандарини и до 60  денари  за  килограм лимони.

„Министерството за економија, како предлагач на Одлуката, соопшти дека врз основа на спроведените консултации со најголемите увозници на овошје и на зеленчук во Република Северна Македонија, како и имајки ги во предвид најновите податоци од Царинската управа, е утврдено дека увозната цена на одредени видови овошје и зеленчук е зголемена, поради претстојните празници. Ова, како што стои во образложението на Министерството, е причината, поради којашто се предлага измена на Одлуката за определување на највисоки цени за одделни производи во трговијата на мало, којашто стапи на сила на 3 април 2023 година, а со што цените на дел од производите опфатени во оваа Одлука се зголемуваат сразмерно на зголемувањето на увозната цена за нив. Зголемување на цената има кај свежите домати, свежите краставици, кромидот, свежите зелени пиперки, гравот, бананите, портокалите, мандарините и лимоните, додека за карфиолот се укинува ограничувањето на највисоката цена, а кај леќата цената останува непроменета“, соопштија од Владата. 

Ваквото ограничување на највисоките цени на овошјето и на зеленчукот во трговијата на мало, останува да важи до 30 април 2023 година.

Но, и по таа владина одлука, факт е дека во текот на денешниот ден домати не можеше да најдат во најголемиот дел од маркетите, ниту, пак, во многу од пиљарите.

На зелените пазари, пак, цената е повисока од максимално предвидената со владината одлука, и изнесува 120 денари.