Новинар од Телма не бил бркан местото каде што седеа косовските новинари, рече претседателот на Собранието откако ги прегледал снимките од безбедносните камери
Новиот претседател на Собранието Јован Митрески вечерва во интервју за 360 степени рече дека косовските новинари не биле привилегирани, за разлика од новинарите од Македонија.
Тој во емисијата рече дека и до него пристигнале реакции за наводно отстранување на дел од новинарите од Македонија кои седнале на местата на амбасадорите. По писмото од Здружението на новинари, тој го повикал одговорниот за обезбедување во Собранието, заедно ги прегледале снимките од безбедносните камери и заклучиле дека немало отстранување на новинари од Македонија кои седнале позади новинарите од Косово.
„Јас не знам која била нивната улога, како што информиравме претходно, имаше и реакција од Здружението на новинари на Македонија и со допис од Кабинетот одговоривме на тоа. Сѐ што може да биде присутно во галеријата е новинари што имаат соодветни акредитации. Такви акредитации имаа сите присутни во галеријата на Собранието. Пред самиот почеток на седницата бев известен од службите дека има голема заинтересираност, прашав дали има најава за присуство на странски гости, претежно амбасадори коишто во некои случаи доаѓаат да следат седници. Прашав дали се присутни од кабинетот на претседателот, коишто исто така имаат свој простор во галеријата. Кога добив информации дека нема други гости, дадов налог да се отвори целосно галеријата за да се обезбеди присуство на сите новинари, уредници, камермани, за следење на седницата. Фактички, такви случаи сме имале претходно за седници кои будат голем интерес кај јавноста. Имало случај за присуство на странски медиуми кога се гласало отворањето на Уставот, поврзано со Преспанскиот договор, кога се гласале заклучоците по францускиот предлог, претежно кога се избираат нови влади, така што, таа беше мојата одлука што ја донесов, за да се обезбедат услови за сите уредници, новинари, камермани, да може да имаат соодветни услови да пренесуваат тоа што се случува“, кажа Митрески.
Собранискиот спикер уверува дека галеријата била достапна еднакво за сите медиумски работници, иако во дел од медиумските извештаи тој ден, како, на пример, на ТВ Телма, можеше да се слушне дека нивниот известувач седнал во редот веднаш зад гостите, но собраниското обезбедување му кажало да се премести.
На дополнително прашање од водителот, дали му се допаѓање атмосферата за избор на нова Влада, алудирајќи на поздравувањата на кандидатите министри со новинарите од Косово и еуфоријата која ДУИ ја правеше во салата. Тој одговори дека не видел ништо невообичаено во салата, додавајќи дека неговото мислење е неважно.
