Нови политичари од Македонија на црната листа на САД: „Како Америка на илјадници километри гледа корупција, а нашите истражни органи не гледаат“, праша премиерот
Американскиот Стејт Департмент вчера го стави градоначалникот на општина Струга и член на партијата на власт од албанскиот блок ДУИ, Рамиз Мерко на црна листа за влез во САД поради тоа што е вмешан во значајна корупција и се мешал во донесувањето на судски пресуди.
Премиерот Димитар Ковачевски вели дека македонските истражни и правосудни органи треба да се запрашаат како САД дошле до информации, а тие не дошле до такви податоци изминативе години.
„Наводите кои што се наведени како основ за ставање на црна листа на градоначалникот на Струга и неговото семејство се сериозни. Се работи за неколку основи и од тоа пораката е дека нашите институции, зборувам за истражните и правосудните органи, треба да ги испитаат наводите кои што се наведени во самото соопштението на Стејт Департментот. Исто така тие треба да се запрашаат како тоа САД дошле до такви информации на кои што ја базирале својата одлука, а се наоѓаат на неколку илјади километри од тука, а нашите органи не дошле до такви податоци во текот на сите изминати години. Ова само уште еднаш потврдува дека на нашиот истражен и правосуден систем му треба генерален ремонт со оглед на тоа дека сакаме да живееме во европска држава“, изјави премиерот Димитар Ковачевски.
Ова е само почеток, најавува амбасадорката на САД во Република Северна Македонија. Таа вели дека поседуваат цврсти докази за корупција кај градоначалникот и член на ДУИ.
„Се врши ревизија на сите докази на се што е утврдено и има една листа на имиња кои се во процес на ревизија и разгледување, откако ќе биде утврдени сите факти тогаш се носи одлука. Ние не можеме да кажеме што понатаму, Владата и судството треба да преземат мерки, но ние ќе продолжиме да соработуваме со тие кои имаат волја да соработуваат со нас“, изјави амбасадорката на САД во РСМ Ангела Агелер.
Координаторот за антикорупција на Стејт департментот вели дека означувањата имаат цел да ја покажат поддршката на САД за владеењето на правото и напорите за борба против корупцијата низ целиот свет.
Ако државниот секретар на Стејт Департментот има веродостојни информации што укажуваат на вмешаност во значителна корупција, тој треба да наметне ограничувања за виза. И така, од гледна точка на законот, од нас се бара да дејствуваме кога тие информации се достапни.
Нефју додаде дека не прави разлика дали санкциите се однесуваат на поранешен или сегашен функционер.
„Повторно, дел од причината зошто ги правиме овие работи е да ги поддржиме актерите од граѓанското општество, да ги поддржиме оние кои се обидуваат да бараат одговорност од корумпираните актери“, кажа американскиот координатор за корупција.
Лани САД ги ставија на црна листа пранешниот премиер Никола Груевски и поранешниот директор на Управата за безбедност и контраразузнавање Сашо Мијалков заради нивна вмешаност во „значителна корупција“.
