Нови 100 возила за „Пошта“: Крај на доцнењата со пратките
По години соочување со недостиг на транспортни средства и доцнења во испораките, Македонска пошта доби значајна поддршка за модернизација на своето работење. Со набавка на 100 нови возила, се очекува значително подобрување на квалитетот и брзината на поштенските услуги.
Директорот на претпријатието, Охран Куртеши, информираше дека станува збор за 90 пикап возила и 10 комбиња, кои ќе помогнат во надминување на долгогодишниот проблем со транспортот.
„Недостигот на возила беше сериозен предизвик во извршувањето на нашите задачи. Со оваа поддршка значително ја подобруваме поштенската инфраструктура и овозможуваме побрза и поефикасна достава“, изјави Куртеши.
Тој посочи дека претпријатието работи на финансиска стабилизација, откако во 2024 година бележело поголеми загуби. Во меѓувреме, се преземаат мерки за намалување на трошоците и зголемување на приходите, како и нови вработувања, имајќи предвид дека просечната возраст на вработените е над 55 години.
Куртеши откри дека дури 37 отсто од вработените биле во администрација, но со реорганизација и одлуки на Управниот одбор, овој процент се намалува согласно препораките на меѓународните стандарди, а бројот на подружници се оптимизира.
Еден од најголемите проблеми биле и заостанатите пратки – во магацините имало околу 600.000 недоставени пратки, но за само една недела тие биле расчистени.
Министерот за транспорт и врски, Александар Николоски, истакна дека вредноста на возилата изнесува 104 милиони денари, при што преку јавна аукција цената била намалена за околу 400.000 евра.
„Со оваа инвестиција ќе овозможиме секое писмо да стигне и до најоддалеченото село“, нагласи Николоски.
Премиерот Христијан Мицкоски посочи дека просечната старост на возилата во „Пошта“ била околу 15 години, а новата флота ќе придонесе за намалување на трошоците за одржување и сервисирање.
Надлежните најавија и понатамошна модернизација, вклучително и дигитализација на услугите и набавка на современа сортирка, која се очекува да биде една од најмодерните во регионот.
Возилата се обезбедени како донација од Владата и Министерство за транспорт и врски, а очекувањата се дека ефикасноста на претпријатието ќе се подобри за околу 15 проценти во наредниот период.
