НОВ СКОК НА ЦЕНАТА НА НАФТАТА – нападите во Либан и намалувањето на каматните стапки во САД го поскапеа „црното злато“
На лондонскиот пазар цената на барелот минатата недела порасна за 4,1 отсто – на 74,49 долари, додека на американскиот пазар цената на барелот порасна за 4,8 отсто – на 71,92 долари.
На светските берзи цените на нафтата пораснаа минатата недела втора недела по ред, бидејќи трговците се надеваат на зголемување на побарувачката откако американската централна банка ги намали каматните стапки, што треба да го поттикне економскиот раст.
На лондонскиот пазар цената на барелот минатата недела порасна за 4,1 отсто – на 74,49 долари, додека на американскиот пазар цената на барелот порасна за 4,8 отсто – на 71,92 долари, пренесува Хина.
Зголемувањето на цените втора недела по ред се должи, меѓу другото, и на намалувањето на каматните стапки во САД. Во средата американската централна банка ги намали каматните стапки за 0,5 процентни поени – на 4,75 до 5 отсто и најави дека до крајот на годината може да ги намали за уште 0,5 процентни поени.
Страв од ескалација на конфликтот
Пониските каматни стапки вообичаено ја стимулираат економската активност и побарувачката на енергија, но за тоа ќе биде потребно извесно време.
Цените беа поддржани и од ескалацијата на тензиите на Блискиот Исток по експлозијата на илјадници пејџери низ Либан, во која беа убиени и ранети голем број членови на Хезболах и цивили. Хезболах возврати со неколку ракетни напади врз цели во Израел, пред Израел да започне целен напад врз Бејрут.
Трговците стравуваат дека ескалацијата на конфликтот може да го наруши снабдувањето од Блискиот Исток, каде што се произведува една третина од светската нафта.
Фото: Принтскрин/Х
