Нов протест па генерален штрајк најавува Трендафилов од ССМ
Претседателот на Сојуз на синдикатите на Македонија, Слободан Трендафилов, во гостување во емисијата „Ноќно студио“ на 4TV.mk најави можност за организирање нов, масовен работнички протест во првата половина на март, како и дополнителни синдикални активности доколку не се исполнат нивните барања поврзани со минималната плата.
Трендафилов посочи дека се разгледува опцијата протестот да се одржи во неработен ден или надвор од работно време, со цел да се овозможи поголема мобилизација на работниците. Според него, ќе биде организиран и превоз за вработените од другите градови, особено за оние кои не присуствувале на претходниот протест одржан на 28 јануари.
Како што најави, покрај протестот, можна е и понатамошна ескалација на синдикалните активности, вклучително и генерален штрајк и иницијатива за собирање 10.000 потписи. Конечната одлука за датумот на новиот протест, рече тој, ќе биде донесена во наредните денови, при што се разгледуваат термини во првата половина на март, меѓу кои и 13, 14 или 15 март.
Трендафилов нагласи дека синдикатот ќе го остави да заврши тековниот месец за да види какви мерки ќе бидат преземени во однос на усогласувањето на минималната плата. Според неговите информации, можно е да се предложи зголемување од 1.666 денари, што, како што оцени, не претставува суштинско подобрување на стандардот на работниците.
Тој посочи дека ваквото усогласување би можело да биде повод за активирање на најавените мерки, вклучително и генерален штрајк. Според него, март е месецот во кој треба да стане јасно дали мартовската плата ќе се зголеми и дали ќе има посериозно покачување на минималната плата.
Трендафилов потсети дека минималната плата во земјава во моментов изнесува 397 евра и дека, според него, таа е значително пониска во однос на минималните плати во регионот. Според ставот на ССМ, потребно е реално и повисоко зголемување кое ќе овозможи подобрување на животниот стандард на работниците.
