Ноќни клубови и кабареа во Охрид и Струга нема да работат ова лето – причината: небезбедни според противпожарните прописи
Дел од познатите ноќни клубови и кабареа во Охрид и Струга, каде секое лето се одржуваат бројни концерти, годинава ќе останат затворени. Според телевизија Алфа, сопствениците решиле да се откажат од угостителската дејност бидејќи не можеле да ги покријат трошоците за спроведување на мерките предвидени со правилникот за заштита од пожари.
Вонредните контроли откриле сериозни пропусти: објектите немале автоматски системи за детекција на пожар, вратите за евакуација се отворале на погрешна страна, хидрантската мрежа не функционирала целосно, а ѕидовите биле обложени со лесно запаливи материјали наместо со огноотпорни.
„И ние како институции не сме усогласени, па се случуваат проблеми како овие. На пример, од еколошки аспект, општината им наложила на сопствениците да редат сунѓери за звучна изолација. Но од аспект на безбедност – сунѓерот гори многу брзо. Сега сум во ситуација да ги терам повторно да ги обложат ѕидовите со огноотпорен материјал, како кнауф, затоа што таванот мора да издржи најмалку 30 минути пожар, а ѕидовите два часа“, изјави за телевизија Алфа Сашо Тодороски, инспектор за заштита и спасување.
Слични пропусти биле утврдени во голем број угостителски објекти ширум земјата. За оние што сепак ќе работат оваа сезона, рокот од 30 дена за исполнување на сите плански документи и мерки е веќе започнат.
„Некои објекти што се дел од станбени згради имаат солидна изолација. Но други, што се импровизирани или пренаменети од магацини во дискотеки, воопшто не исполнуваат стандарди. Со регулаторната гилотина се укинаа проверките и се издаваа лиценци без реални инспекции, па се случи ова што се случи. Најитно е повторно да се усогласат законите“, додава Тодороски.
Шест објекти се веќе привремено затворени и добија парични казни. Од Дирекцијата за заштита и спасување за телевизија Алфа велат дека после контролите, свеста кај сопствениците значително се подобрила и уверуваат дека летово сите објекти што ќе работат ќе ги исполнуваат противпожарните стандарди.
