„Ниту една повеќе“ на протест пред Собранието: Жртвите пријавувале, но нивните пријави не биле ставени во системот за правда кој треба да ги штити!
Денеска попладне улиците низ Скопје беа исполнети со граѓани кои се собраа на протест во знак на солидарност и осуда за фемицидот што се случи во Велес. Организатор на протестот е движењето „Ниту една повеќе“, кое го повикува општеството и институциите да се справат со родово базираното насилство со максимална сериозност.
Сара Миленковска, претставничка на движењето, истакна дека случајот во Велес не е изолиран инцидент.
„Ова не се случува само еден или двапати месечно, туку секојдневно. Во нашата работа гледаме случаи каде што жртвите со месеци и години предупредувале, а нивните пријави не биле адресирани како што треба. Случаите не се ставаат во системот за правда кој треба да ги штити,“ нагласи Миленковска.
Таа посочи дека во јавноста се гледа тенденција за систематизација на проблемот и недостаток на осуда.
„Политичарите ќе речат дека е мал проблем и топката ќе ја префрлат врз полицијата или судовите, но секој од нас е учесник. Нормализирањето на насилството само придонесува насилниците кои живеат меѓу нас да не чувствуваат никаква одговорност и никаков страв,“ додаде таа.
Протестот продолжи со скандирања и транспаренти со пораки за правда, заштита и нулта толеранција кон родово базираното насилство. Организаторите апелираа институциите да преземат конкретни мерки за да се спречат нови трагедии и да се осигура дека секоја пријава за насилство се третира сериозно и правично.
Ова беше уште еден глас од улиците на Скопје за промена и за одбрана на правата на жените – со јасна порака: „Ниту една повеќе“.
Фото: Марио Андоновски / 4NEWS.mk
