„Ништо на светот не би сменил за мојата луда авантура до клупата на најмоќната женска селекција!“
Андоновски повеќе од две децении живее и работи во Америка, после фудбалската кариера од Вардар, Цементарница и Македонија ЃП во 90-те години, па прво почна да игра мал фудбал, а потоа се префрли на женскиот фудбал и сега е еден од топ десетте тренери на светот во женска конкуренција.
Популарниот Шате со САД веќе тргна успешно на актуелниот женски Мундијал во Австралија и Нов Зеланд во обид да се одбрани светскиот трон и да се освои петтата светска круна по таа во 2019 година, кога беше назначен за селектор веднаш после освојувањето на титулата. Андоновски пред две години првпат ја водеше САД на едно големо натпреварување, на ЛОИ во Токио, каде освои бронза.
„Мојата кариера е луда авантура, но една голема авантура и не би ја сменил за ништо на светот. Низ сѐ што поминав, за да дојдам до оваа позиција (селектор на САД – н.з.), ми помогна да бидам тренер каков што сум. Од тренирање млади категории, преку футсал, голем фудбал… Тоа се елементи што јас од секое ниво ги земав како претходни искуства во тренерската кариера. Затоа овој настап на СП е нешто апсолутно неверојатно, едно искуство кое ми носи посебна возбуда и предизвици кои нѐ чекаат и ќе бидат тешки, но затоа уште повозбудлива ќе биде оваа авантура“, вели Андоновски.
Тој откри два детали кои се клучни за неговата работа во американската селекција, првата аналитичноста и максималната посветеност на секој детал, а втората семејните вредности како темел за семејна атмосфера во националниот тим.
„Јас сум човек кој е многу аналитичен и многу посветен на детали. А, тоа ме направи мојот математички беграунд (во Македонија учел математика на највисоко ниво, а бил регионален шаховски првак). На овој дел би го додал и мојата посветеност кон семејството, така да јас се обидувам да создадам семејно опкружување во репрезентацијата и тоа е нешто што нѐ води напред. Кога ја добив работата, знав во што се впуштам, дека седнувам на кормилото на најдобриот тим на светот. Знам сега дека главна цел е да се освои Мундијалот, но има и други работи кои ги подготвувавме, а тоа е подготовка на тим и за подолги стази, со 14 нови фудбалерки, да имаме тим за следните ЛОИ и следното СП“, додава Андоновски.
