Николоски очекува брзо решение од ЕК за проблемот со превозниците од Западен Балкан
Вицепремиерот и министер за транспорт Александар Николоски изјави дека се очекува Европската Комисија во најскоро време да предложи решение за проблемот со превозниците од регионот, кој предизвикува сериозни тешкотии во транспортот и логистиката. Тој потенцира дека Македонија има поддршка од земјите членки на ЕУ и дека е важно да се изнајде решение за доброто на целокупната економија.
„Во однос на можните решенија, се разгледуваат неколку алтернативи. Едната е примената на истите правила како за пилотите, кабинскиот персонал, машиновозачите и персоналот во возовите, каде овие ограничувања не важат. Втората варијанта е помалку прифатлива – одложување на системот за една година додека не се најде трајно решение. Третата опција предвидува секоја земја членка на Шенген зоната да издава работни визи за транспортерите, како што тоа го прави Швајцарија, а четвртата варијанта ќе ја предложи самата Европска Комисија“, појасни Николоски.
Тој предупреди дека нерешавањето на проблемот ќе има сериозни последици врз транспортните компании, кои во просек имаат 240–250 работни денови годишно, а тоа ќе влијае и на извозот кон Велика Британија, вториот најголем трговски партнер на Македонија, при што ланецот на снабдување би бил запрен или значително намален.
„За ова прашање реагираме цела година. Претседателот на Владата имаше директни разговори со претседателката на Европската Комисија, министерот за надворешни работи и јас исто така имав состаноци во Брисел со Комесарот за транспорт и Директорката за транспорт и мобилност. Ситуацијата е ескалирана и сега се обидуваме да помогнеме колку што можеме. Вчера бев во посета на Загреб, каде разговарав со потпретседателот на хрватската Влада, кој јавно побара Европската Комисија да го реши проблемот, застанувајќи целосно на наша страна. Дополнително, имав средби со претседателот на Стопанската комора на Хрватска, во Саборот, како и три средби со грчкиот министер за транспорт, бидејќи и тие се директно погодени“, додаде Николоски.
Тој нагласи дека конечната одлука за визната политика во рамки на Шенген зоната е во надлежност на Европската Комисија, и дека Македонија доставила свои предлози и очекува конкретни мерки за олеснување на работата на регионалните превозници.
