Никој не сака да го преземе телото на убиецот од Градачац
Никој , дури ни неговиот татко, не сака да го преземе телото на Нермин Сулејмановиќ, кој во петокот на 11 август уби три лица во Градачац, а потоа се самоуби. Негови познаници за новинарите на „Аваз“ во Градачац изјавиле дека таткото на Нермин Сулејмановиќ рекол: „ Не ме интересира тоа г***о“.
Сулејмановиќ ја уби својата невенчана сопруга Низама Хеќимовиќ пред очите на нивната ќерка, пренесувајќи се во живо на Инстаграм. Потоа тој уби уште две лица во градот, татко и син, Џингис и Денис Ондер, кои ги познавал од порано. Во крвавиот поход Сулејмановиќ рани три лица, меѓу кои и мајката на Денис.
Најмалку 15.000 луѓе го следеа „крвавиот поход“ на Сулејмановиќ на социјалните мрежи, а федералната полиција уапси 40 лица кои го поддржувале во текот на преносот „во живо“. Затоа министерот за безбедност на БиХ, Ненад Нешиќ изјави дека мора да се поведе „многу повеќе“ сметка за менталното здравје на босанско-херцеговското општество.
„Не можеме да ја амнестираме ниту судијката која, очигледно, набрзина и недоволно посветена на случајот, донесла одлука да ја одбие жалбата на жртвата и да не го прифати барањето за забрана за приоѓање“, изјави Нешиќ.
Судијката од Градачац, Лејла Нумановиќ, како што објавија медиумите во Босна и Херцеговина, дел од решението го „копирала од друг предмет“.
Но, одлуките за забрана за пристап до жртвата не секогаш даваат резултати, забележува Вехид Шехиќ. „Сведоци сме, а тоа го потврдуваат и анализите не само во Босна и Херцеговина, туку и во Хрватска и Србија, дека многу убиства биле извршени токму од оние на кои им било забрането да ѝ се приближуваат на жртвата“, вели соговорникот за Дојче Веле.
Друг соговорник потенцира дека државата е должна да обезбеди заштита на граѓаните и да спроведе истрага кога ќе се случи трагедија. „Но, во Босна и Херцеговина нема независна истрага, нема превенција, нема елементарна одговорност, така што повторувањето на трагични епизоди е логична последица“, предупредува тој.
