Никој како Македонија ЃП: Шест пати по ред добива пенал-рулет во Купот!
Треба да се „раскопа“ четири сезони наназад за да се пронајде кога последно „лавовите“ од Ѓорче Петров загубиле на пенали во Купот на Македонија. Потрагата нè врати назад во финалето од сезоната 2018/19, кога Академија Пандев ја совлада Македонија по изведување пенали, откако основните 90 завршија со 2-2, а немаше голови во продолженијата (иронично, тогаш Љупче Дориев постигна гол за 2-2 во 86. минута за да ја спаси Академија Пандев од негатива, а денеска тој го утна пеналот за елиминација на Шкендија).
Оттогаш, Македонија ЃП одигра 13 натпревари во Купот на Македонија, а од нив на шест имало потреба да се изведуваат пенали и сите шест ги добила!
Овој со Шкендија беше последниот и единствен сезонава. Лани единствено во првото коло, против Детонит, славеше со 3-0, а потоа Академија Пандев, Шкупи, Струга и Силекс во финалето ги покори со пенали. Серијата почна на стартот на сезоната 2020/21, кога ја совлада Победа на пенали во првото коло.
Од друга страна, ова ќе биде четврто клупско финале во Купот, а дури три од нив добиле разрешница по удари од 11 метри. Ланското со Силекс е последно и единствено добиено. Она со Академија Пандев од 2019 е вториот пораз, по 2009, кога загубија од Работнички на чекор до пехарот. Единственото финале во кое „лавовите“ не шутирале пенали е епското од 2006, кога ја совладаа Шкендија со 3-2, со голот на Филип Ивановски во 95. миунта.
2022/23 полуфинале – Македонија ЃП – Шкендија 1-1 (4-3 на пенали)
2021/22 финале – Македонија ЃП – Силекс 0-0 (4-3 на пенали)
2021/22 полуфинале – Македонија ЃП – Струга ТЛ 0-0 (4-2 на пенали)
2021/22 четврт-финале – Македонија ЃП – Шкупи 0-0 (4-1 на пенали)
2021/22 2. коло – Македонија ЃП – Академија Пандев 1-1 (5-3 на пенали)
2020/21 1. коло – Македонија ЃП – Победа 0-0 (5-4 на пенали)
2018/19 финале – Македонија ЃП – Академија Пандев 2-2 (2-4 на пенали)
