„Ние знаеме што значи да се биде бегалец“ – Урбановиќ: Македонија покажа огромно срце, испратени над 600 тони хуманитарна помош за Украина
Олександар Урбановиќ од здружението „Лесја Украинка“, во гостувањето на 4TV.mk по повод четиригодишнината од почетокот на војната во Украина, упати емотивна благодарност до македонскиот народ и бизнис секторот за несебичната поддршка пружена уште од првите денови на конфликтот.
Според Урбановиќ, иако секогаш може да се дебатира дали можело да се направи повеќе, заедницата на Украинците во Македонија никогаш нема да ја заборави солидарноста што ја почувствувале во најтешките моменти.
Тој истакна дека од Македонија досега се испратени повеќе од 600 тони хуманитарна помош, што за држава со оваа големина претставува огромен придонес. Оваа поддршка, како што вели, е резултат на заедничките напори на граѓаните и приватниот сектор.
Урбановиќ потсети на моментите кога Македонците самоиницијативно нуделе помош, засолниште и храна за украинските семејства.
„Никогаш нема да ја заборавиме таа поддршка во првите денови кога ги поставувавме шаторите. Луѓето доаѓаа, ги оставаа своите телефонски броеви и велеа: ‘Ние знаеме што значи да се биде бегалец, запишете нè и јавете ни се ако треба некој да згрижиме’. Луѓето примаа бегалци во своите домови, нудеа храна и облека, и сето тоа го правеа без никаков надомест“, изјави Урбановиќ.
Тој заклучи дека иако Македонија е мала држава, нејзината континуирана поддршка за Украина е голема и значајна, поради што украинскиот народ останува вечно благодарен.
Целата емисија во продолжение:
