Кристина Атовска за 4TV.mk разговара за искуствата од военото известување во Украина
Новинарката Кристина Атовска, која двапати известуваше директно од Украина, гостуваше на 4TV.mk каде ги сподели своите искуства од теренот и предизвиците со кои се соочуваат новинарите во војна зона.
„Тоа не ми беше нова идеја“, рече Атовска, објаснувајќи дека проблемот е што локалните медиуми ретко инвестираат во вакви новинарски проекти.
„Тоа е сериозен проблем, и за нас како новинари, и за целата јавност“, вели таа.
Сепак, желбата, како што вели, да известува од конфликтни подрачја постоела секогаш.
„Сметам дека новинарството најмногу треба да биде за оние кои се најзагрозени, особено за оние кои немаат можност да го кажат својот глас. Кога ќе почне војна, тоа се луѓето кои остануваат заглавени во најопасните области или оние кои се најмногу изложени на гранатирање.“
Атовска истакна дека известувањето од воена зона бара детални подготовки и логистика, но додаде дека задоволството и потребата да се прикаже вистината за животот во конфликтните подрачја се најголемите мотиви за вакво ризично новинарство.
