Невиден спектакл на Стемфорд Бриџ: Челси губеше до 100. минута, па го победи Јунајтед (ВИДЕО)
„Сините“ победија со 4-3, а мечот го одбележаа два пресврта и голови за победа на домашниот тим во 100. и 101. минута. По 19 минути игра, Челси водеше со 2-0 со головите на Галагер и Палмер од пенал и се чинеше дека Јунајтед ќе доживее катастрофа. Сепак, од 34. до 39. минута, гостите го израмнија резултатот преку Гарначо и Бруно Фернандес, а во 67. минута Гарначо, на извонредна асистенција на Антони го комплетира првиот пресврт.
Јунајтед беше во водство до 100. минута кога Далот несмасно стартуваше во Мадуеке во својот шеснаесетник и Челси доби уште еден пенак. Палмер повторно беше прецизен од белата точка, а во следниот напад по трет пат ја затресе мрежата на Онана за конечна победа на Челси.
Потешко од очекувањата Ливерпул слацеше на домашен терен против последнопласираниот тим на табелата во Премиер лигата, Шефилд Јунајтед кој многу веројатно идната сезона ќе игра во понизок ранг.
„Црвените“ славеа со 3-1, но сами си ја искомплицираа работата и до 76. минута резултатот беше 1-1. Мечот почна со чудниот гол на Нуњез кој не ни шутна, а ја затресе мрежата на Шефилд Јунајтед. По 13 минути игра во вториот дел Бредли си постигна автогол, но Мекалистер со атрактивен гол и Гакпо во 90. минута се погрижија бодовите да остане на Енфилд.
Ливерпул и натаму има два бода предност пред Арсенал, но претстојниот викенд го очекува тешко гостување кај Манчестер Јунајтед.
