Несторовски по 50-от настап: Сите ми се омилени, но посебен ми е тој со – Грузија!
Тој вели дека секој натпревар за Македонија му е омилен, но доколку треба да издвои тоа е мечот против Грузија по кој се пласиравме на Европското првенство.
„Сите ми се омилени натпревари за македонската репрезентација, но морам да ја издвојам таа со Грузија. Сигурно ќе ми беше некој од европското првенство, но поради повреда не можев да настапам на шампионатот. Се разбира со Италија во Скопје бев стрелец, но тој натпревар го загубивме, затоа мора да ми биде омилен тој меч кој што го имаме добиено“, изјави Несторовски.
Прилепчанецот од Удинезе посочи дека очекува уште подобро да игра Македонија веќе во јуни, само здравјето да ги послужи и верува дека може да се продолжи победничката серија со Украина која е прв следен противник.
„Целта пред овој собир беше две победи и си ја остваривме. Победивме со Малта дома, победивме и со Фарски Острови. Респект за секој национален тим, но покажавме дека сме подобри од овие ривали. Сега со голема позитива гледаме кон јунскиот циклус. Тешко е да играш натпревари со ривали кои се бранат, не можеш многу да добиеш бидејќи цела нација очекува победа. Ние бевме концентрирани од почеток до крај, дадовме гол и победивме. Се надевам сите ќе бидеме здрави во јуни, оваа репрезентација од меч во меч игра подобро. Ни следат два квалитетни меча, но ние сакаме да ја продолжиме таа победничка серија. Концентрирани сме само на Украина и сакаме да останеме при врвот на табелата“, додаде Несторовски.
