Несовесното лекување било систематско, не случајно, велат од обвинителството за случајот „Онкологија“
Здравиот има многу желби, а болниот само една – да оздрави. Болните и нивните семејства имале доверба дека ќе добијат соодветна терапија и дека нивното здравје нема да биде загрозено, изјави обвинителката Ана Гоговска Јакимовска во воведниот говор на судењето за случајот „Онкологија“. Случајот се води против поранешниот директор на Клиниката за онкологија, Никола Васев, кој заедно со тројца онколози е обвинет за несовесно лекување пациенти.
Обвинителката најави дека пред судот ќе презентира докази дека првообвинетиот Васев свесно и систематски постапувал спротивно на стандардите, предизвикувајќи сериозни последици по здравјето на пациентите.
„Обвинетиот извршил повеќе исти дејствија кои грубо ги прекршиле светските и европските онколошки упатства. Терапиите се спроведувале без конзилијарна одлука, со несоодветно дозирање, без проценка на перформанс статус и биохемиски параметри на пациентите. Некои терапии биле аплицирани и кога не биле потребни, со што биле штетни и неефективни“, изјави Гоговска Јакимовска.
Таа додаде дека несовесното постапување било овозможено и преку второобвинетата Мери Пешевска, која му овозможила на Васев пристап до системот и финализирање на терапии без соодветна контрола.
„Онколошкото лекување бара исклучително внимание бидејќи грешките можат да имаат фатални последици. Несоодветно дозирање, непочитување на меѓународни упатства и отсуство на конзилијарно одлучување резултирало со сериозни здравствени ризици за пациентите“, нагласи обвинителката.
Судењето се однесува на пациенти кај кои биле применети неподобни терапии, со отстапувања во дозирањето и без соодветна проценка на здравствената состојба, при што се оштетени 29 пациенти.
Покрај тоа, против Васев и поранешниот економски директор на Клиниката е поднесено обвинение за злоупотреба на службена положба и проневера, со штета од над 2,2 милијарди денари за државниот буџет.
