„Немаме други играчи, ова се најдобрите, ако нема напредок ќе преземам одговорност“
Селекторот не побегна од заклучокот дека првото полувреме беше очајно на секој план. Македонија во него достигна максимални минус осум и ништо во играта не функционираше. Савевски вели дека овој бавен влез во натпреварите не е првпат.
„Оваа година и пол, додека сум во репрезентацијата, на сите мечеви првите полувремиња ни беа катастрофални. Дали домашниот терен создава голем притисок, навистина треба да се види. На гости играме подобро. Многу лошо беше, слабо во одбрана и напад, слаб ефект на и голманите во првото полувреме, мислам имавме само четири. Не можеше да се види дека сме работеле добро во периодов. За разлика од тоа, во вториот дел одигравме подобро, кога се виде дека младите играчи може многу да дадат. Се надевам дека на реваншот во Унгарија ќе играме ќе бидеме подобри. Разликата во квалитет не е голема. Овој пат Украинките покажаа брза игра и тие прават грешки. Во оваа ситуација со овие играчи мислам дека една мотивирана екипа која ќе почне добро, и ќе се поправи, може да одиме да изненадиме во вториот меч. Немаме друго што. Се надевавме вечерва дека ќе победиме 4-5 разлика. Никогаш не коментирам судии, но мислам дека во многу ситуации судеа онака како што не ни одговара“, рече Савевски.
За да се промени нешто до реваншот во следниве три дена нема време. Ракометарките се тие што ги имаме, вели селекторот, единствено што се надева дека ќе бидеме засилени со Младеновска и Арсениевска, кои го пропуштија овој дуел поради висока температура и вироза. Останатите – тие се.
„Имавме големи промашувања од најдобрите играчи. Сега останува само да поправиме она што може да го поправи. Викам дека правиме репрезентација, но треба повеќе време. Но, колку е тоа време ќе видиме. Треба да созреат младите девојки. Немаме друг избор, немаме многу играчи да донесеме. Ова се најдобрите играчи. Прецизноста и реализацијата не се поправаат за нтри дена. Тоа почнува од клубовите, проблем е тоа што многу од нив не играат стандардно во своите клубови или играат во македонската лига. Не се тоа играчи кои играат 60 минути па да ја носат екипата“, дополни селекторот.
Неговиот ангажман, не само во сениорската, туку и во младинските селекции е предвиден до септември, откако ќе завршат двете ЕП за јуниорките и кадетките. Ако не забележи напредок вели дека е подготвен и да преземе одговорност.
„Ние цело ова време се обидуваме да направиме спој на младоста и искуството. Мене договорот ми е до септември, ако не успеам да направам селекција ќе преземам комплетна одговорност. Сите имавме големи очекувања, имавме добро расположение, очекувавме да одиграме многу подобро, ги гледавме мечевите на Украина кои играа добро, но не брзо. Но, ме изненадија во првиот дел кога играа брзо, како да тргнаа да прават огромна разлика. Имавме и многу исклучувања. Слабата реализација секогаш ни е проблем“, заврши Савевски.
