Нема согласност за минималецот, но ќе се формира официјална потрошувачка кошница
Нема договор за минималната плата, но ќе биде формирана официјална потрошувачка кошница која ќе ја креираат синдикатите, Државниот завод за статистика, Организацијата на потрошувачи, како и министерствата за економија и за финансии. Ова беше договорено на денешната седница на Економско-социјалниот совет (ЕСС) што се одржа во Владата.
Претседателката на Организацијата на работодавачи, Владанка Трајкоска, изјави дека телото кое ќе ја дефинира официјалната потрошувачка кошница најверојатно ќе биде формирано на следната седница на ЕСС.
„Нема договор за минималната плата. Се дискутираше за минималната синдикална кошничка, но се официјализираше дека ќе има официјална потрошувачка кошница која ќе ја креираат сите засегнати страни. Сметаме дека таа ќе биде институционално признаена и ќе ги дефинира сите релевантни елементи за една кошничка“, изјави Трајкоска по седницата.
Таа додаде дека дискусијата околу минималната плата продолжува, но без конкретни ставови и заклучоци. Сите присутни изразиле желба за усогласување со стандардите на ЕУ, но сепак нагласила дека Европската комисија нема конкретни директиви за потрошувачките кошници. Во регионот и ЕУ секоја држава има свои различни пристапи, а синдикалните кошници во некои случаи се дури двапати поголеми од официјалните.
„Тоа се политички одлуки и елементи кои синдикатите користат како метод за притисок“, додаде Трајкоска.
Претходно, работодавачите истакнаа дека е можно минималната плата да достигне и повисока сума од 450 евра, доколку Владата субвенционира дел од придонесите.
