Нема наследник за Коцевски: Пропадна обидот за избор на в.д. државен обвинител – Советот ја одложи седницата
Институционалниот вакуум во Јавното обвинителство продолжува. Советот на јавни обвинители денеска не успеа да избере вршител на должноста (в.д.) државен јавен обвинител, откако итната седница беше одложена во последен момент.
Наместо да се определи кој привремено ќе раководи со институцијата по оставката на Љупчо Коцевски, седницата закажана за 11:00 часот не се одржа. Причината, според официјалното соопштение, е отсуството на еден од членовите.
Од Советот информираат дека одложувањето е направено по предлог на член на Советот.
Ова одложување доаѓа во момент на висок напон во правосудниот систем. Постапката за итен избор на в.д. обвинител беше иницирана откако досегашниот шеф на обвинителството, Љупчо Коцевски, завчера поднесе неотповиклива оставка. Тој се повлече само неколку часа пред Собранието да расправа за предлогот на Владата за негово разрешување.
Ваквиот развој на настаните предизвика реакции во јавноста, бидејќи обвинителството останува без прв човек во период кога се отвораат сериозни истраги.
Додека се чека понеделничкиот избор на в.д. од редот на постојните републички обвинители, тече и другата законска обврска. Собранието мора во најкус рок да распише оглас за избор на нов државен јавен обвинител со полн мандат. Вршителот на должност ќе ја води институцијата до завршување на таа процедура, но не подолго од шест месеци.
