НЕМА МАГИЈА, ИМА САМО ЗДРАВО И СТЕГНАТО РАБОТЕЊЕ – како УСЈЕ достигна профит од 25 милиони евра за девет месеци

Иако се тие врв над сите врвови, не се само македонските банки профитабилни бизниси. 

Има и други успешни и етаблирни компании, чии профити растат од година во година, и чии бизниси се стабилни и перспективни.

Скопската цементарница УСЈЕ покажа дека е еден од тие бизниси, завршувајќи ги првите девет месеци од годинава со чист профит од над 25 милиони евра. 

Тоа е зголемување за дури 40 проценти во однос на истиот период од претходната година, што е резултат за пофалба, иако треба да се има предвид дека 2023 година важеше за кризна и инфлациска, што им го отежнуваше работењето на компаниите.

А, овој успех во делот на профитабилноста УСЈЕ го постигнува во услови кога кај оперативните приходи нема раст, односно тие се на идентично ниво како и во првите девет месеци од претходната година. 

Но, тоа не значи дека не станува збор за одлични приходи, имено, тие изнесувале дури 77,2 милиони евра. 

Најголем дел или речиси сите отпаѓаат на приходите од продажбата, кои изнесуваат 76,1 милиони евра, што е мал раст за 3 отсто во однос на истиот период од минатата година. 

Најмногу приливи односно приходи УСЈЕ има од продажба на домашниот пазар, кои биле на ниво од 50,93 милиони евра, што покажало зголемување за 3 проценти, додека, пак, приходите од продажба на странски пазар се на исто ниво, само малку намалени, и тие изнесувале 25,1 милиони евра.

Но, затоа во голема мерка се намалени оперативните расходи, за дури 12 отсто во однос на претходната година, и изнесувале 48,5 милиони евра. Тоа е всупшност тајната на растот на добивката, кога се успева на исти приходи, да се стегнат расходите, и да се зголеми добивката од работењето. 

Најголема ставка се трошоците за суровини и други материјали, кои биле 27,2 милиони евра, но кај нив има намалување за 12 проценти.

Трошоците за вработените изнесувале 4,8 милиони евра, и се зголемени за 9 отсто.

Сето тоа прави оперативна добивка од 27 милиони евра, а на неа треба да се додадат и огромните финансиски приходи, кои имаат и огромен раст во однос на истиот период лани, или тие биле на ниво од 710 илјади евра, а целиот износ се должи на паметнио вложувања што си ги направила компанијата, односно приходи од вложувања, заеми, камати и курсни разлики.

А, кога ќе се плати данокот, чистиот профит е над 25 милиони евра, или за 40 отсто зголемен во однос на лани.

Н.Н.Ф.