Некомплетни токсиколошки анализи? – Семејствата на загинатите од Пулс бараат одговори за причината за смрт
Здружението на граѓани „16-ти Март 2025“ јавно реагира поради, како што наведуваат, сериозен јаз меѓу институционалните тврдења и официјалната обдукциска документација во врска со причината за смртта на настраданите деца во трагичниот настан во клубот.
Од здружението посочуваат дека во одговор на Основното јавно обвинителство се наведува оти вештачењата на Институтот за хемија и анализите на МВР–Одделот за форензички испитувања (ОФИ) ја потврдиле веројатноста за испуштање цијанидни гасови, како последица на согорувањето на материјалите во објектот. Сепак, клучното прашање, според нив, останува без одговор: дали при обдукциите е направена конкретна и насочена токсиколошка анализа за цијанид и други отровни гасови во телата на починатите.
Во конечните обдукциски наоди, како причина за смртта е наведено задушување од јаглерод моноксид (CO). Но, здружението укажува дека во самиот обдукциски налог јасно стои оти од телата се земени крв и урина не само за утврдување на CO, туку и за поширока токсиколошка анализа, со напомена дека дополнителните резултати ќе бидат доставени накнадно.
„До денес, овие дополнителни токсиколошки резултати не им се доставени на семејствата, ниту се содржани во конечните обдукциски наоди“, наведуваат од „16-ти Март 2025“. Според нив, ова отвора сериозен сомнеж дека заклучокот за причината за смрт е донесен без целосна и соодветна токсиколошка анализа, особено имајќи предвид дека водородниот цијанид не се детектира рутински и бара специфично и навремено испитување, бидејќи брзо се метаболизира.
Како дополнителен аргумент, здружението посочува дека кај поголем дел од починатите биле утврдени ниски или нефатални вредности на јаглерод моноксид, што, според медицинските стандарди, не е доволно за заклучок дека смртта е предизвикана исклучиво од CO. Тие нагласуваат дека цијанидот може да предизвика смрт и без високи CO вредности.
Од „16-ти Март 2025“ зборуваат за судир меѓу институционалните наоди, наведувајќи три, како што велат, неспоиви факти: институциите потврдуваат веројатност за ослободување цијанидни гасови, обдукциските наоди ја наведуваат исклучиво интоксикацијата со CO како причина за смрт, а обдукцискиот налог признава дека други токсиколошки анализи допрва требало да бидат доставени.
Сè додека не се објават и официјално документираат резултатите од сите дополнителни токсиколошки анализи, од здружението сметаат дека не може со сигурност да се тврди дека причината за смрт е целосно и точно утврдена. Според нив, тоа значи дека обдукцискиот наод е нецелосен, постои основа за дополнително или независно вештачење, како и за правно оспорување на донесените заклучоци.
„Ова е оправдано и неопходно во интерес на вистината, правдата и достоинството на починатите“, порачуваат од Здружението на граѓани „16-ти Март 2025“.
