„Некој ми подаде рака и ме спаси од најлошото“ – Сведоштва на дел од лицата кои беа кобната ноќ во „Пулс“
Дел од тимот на Support Kocani денеска беа во студото на ТВ21 во емисијата „Дејли Клик“ на ТВ21, каде разговараа за кобната ноќ во дискотеката „Пулс“ и како успеале да се спасат.
Дарио Трифунов, Мартин Розин Сопков, Љубомир Игнатов, Бојан Манасиев ги кажаа своите сведоштва.
Игнатов вели дека животот му се дели на два дела, пред и после трагедијата.
„Животот во Кочани ќе се дели до трагедијата, и после трагедијата. Добри емоции не може да имаме, и сега на некој начин имаме микс чувство, за едни кои се враќаат дома и закрепнуваат се радуваш, за други кои ги загубија животите тагуваш. Ќе ни остави белег, мислам дека секој кој го почувствувал тој хаос, ќе се соочи со тоа до крајот на живот, нема никогаш да биде заборавени“, рече Игнатов.
„Јас, Бојан и Дарио бевме заедно на иста маса, со повреди не се здобивме, но целата помош наша беше за транспортот на повредените лица, ние дадовме се што можеме, Љубомир имаше малку повреда“, изјави Розин Сопков.
Игнатов додаде и дека бил заглавен во стампедо, и дека некој успеал да го спаси, но и натаму не знае кој успеал да го извлече од таа гужва.
„Имав изгореница само на лицето, внатрешниот систем респираторен ми беше чист, бев заглавен во стампедо. Во еден момент изгубив свест, некој ме извлече, сакам да знам кој, не сум свесен кој ме извлече. Ми требаше мал период после оваа трагедија да се вратам во нормала, но како што реков оваа трагедија ќе остави белег до крајот на животот“, изјави Игнатов.
Бојан Манасиев рече дека имал среќа што бил на влезот од дискотеката, па успеал брзо да излезе, и да биде без повреди.
„Бевме сите заедно на влезот, и имавме голема среќа да излеземе без повреди. Чувствуваме и ќе чувствуваме тага за починатите, сето тоа се млади живот кои не требаше така да згаснат“, рече Манасиев.
