„НЕ ЗНАМ КАДЕ Е ГРУБИ, НО СИГУРЕН СУМ ДЕКА БИ СЕ ВРАТИЛ ВО ЗЕМЈАВА КОГА БИ ЗНАЕЛ ДЕКА ЌЕ СЕ СООЧИ СО НЕСЕЛЕКТИВНА ПРАВДА“ – Крешник Бектеши во Бизнис муабети на Фактор
Нашата држава е единствената држава во регионот која има инфлација над 5 проценти, во време кога инфлацијата е спласната на глобално ниво, но и на европско ниво, и е намалена во државите со кои ние имаме најголема трговска размена.
За ова, но и за многу други интересни и пикантни теми зборува поранешниот министер за економија од редовите на ДУИ, Крешник Бектеши, во поткастот „Бизнис муабети“ на порталот Фактор.
„Ако зборуваме за увозна инфлација, ако зборуваме за зависност од одредени производи, тогаш треба да направиме споредба со тие држави во ЕУ со кои имаме најголема трговска размена за овие производи. Таму во континуитет има намалување на инфлацијата, а се случува спротивното во нашата држава“, објаснува Бектеши.
Имавте забелешки, знаете, за она играњето фудбал во канцеларија, и дали имало матни зделки впо претходната владејачка коалиција, прашува водителот Мишко Иванов, а на ова, Крешник Бектеши го дава следниов одговор.
„Знаете, играњето фудбалче не било со намера да навреди некого во нашата држава. И јас сум кажал и претходно дека ако одреден граѓанин се чувствувал навреден, јас и јавно се извинувам, и во име на моите колеги, и во мое лично име. Тоа беше нешто што го правеа и одредени други луѓе што ја посетија таа канцеларија. И вие знаете. Но, тоа се користеше од страна на тогашната опозиција се со цел дса се направи некоја си атмосфера дека еве, ‚ДУИ ни ја презеде државата, Албанците ни ја презедоа државата, а треба да се знае дека Албанците ни тогаш, ни сега, никому ништо не му зеле“.
Иванов на Бектеши му го поставува и прашањето дали ДУИ во времне на заедничкото владеење го уценувале СДСМ, на што поранешниот министер за економија одговара.
„Никако, значи со Министерството за економија, со Министерството за политички систем, Министерството за финансии и Министерството за образование. Зошто не се отвора темата, господинот Арбен Таравари, со кого коалицираше, со СДСМ. Зошто тогаш и за нивните министерски места, за кои ние сме немале никаква врска, бидејќи тие преговарале со мандатарот, ги ставаат на товар на ДУИ, или како уцена дека ДУИ најверојатно уценувале. Алијанса за Албанците, Беса и Алтернатива преговорите ги правеа со мандатарот, а не со нас“, објаснува Бектеши.
Иванов прашува дали Бектеши има комуникација и дали знае каде во моментов се наоѓа Артан Груби, кој заврши на американската црна листа, на што тој одговара дека лично со него нема комуникација.
„Немам информации каде е, но знаејќи го господинот Груби, јас сум убеден дека ако тој оцени дека ќе има неселективна правда, би дошол и би се соочил со правдата. Кои се причините и зошто не доаѓа, немам никаква информација, бидејќи немам комуникација со господинот Груби“, вели Бектеши.
