НЕ СЕ СРЕТНА СО ВУЧИЌ: Курти има три услови
Косовскиот премиер Албин Курти поставил три услови за средба со српскиот претседател Александар Вучиќ.
Високиот претставник на ЕУ за надворешна политика и безбедност Жосеп Борел изјави дека денеска Косово не било подготвено за трилатерална средба и дека поставило три услови за тоа да се случи, а од друга страна Србија била подготвена за средбата, јави дописникот на МИА од Белград.
Борел изјави дека Курти побарал „формализација на основниот договор, да се отфрли писмото во кое поранешната премиерка на Србија, Ана Брнабиќ, кон средината на декември минатата година изрази резервираност кои се однесуваат на обврските кои произлегуваат од договорот за патот кон нормализација на односите со Република Косово, вклучително и анексот за спроведување и Милан Радоичиќ да им се предаде на правосудните органи во Приштина“.
„Србија не беше подготвена целосно да ги исполни барањата на Косово, повикувајќи се на уставните ограничувања“, рече Борел.
Српските власти се спремни да разговараат за компромис со Приштина.
Вучиќ изјави дека во Брисел имал соодветни билатерални средби со високиот претставник на Европската унија за надворешни работи и безбедност, Жозеп Борел и специјалниот пратеник на ЕУ, Мирослав Лајчак, но дека немало билатерална средба со косовскиот премиер Албин Курти, бидејќи Курти не сакал да се сретне со него.
„Коректна средба со Борел и Лајчак. Втор состанок немало со Курти, бидејќи Курти не сакал или не смеел да се сретне. Три пати се враќав на состанокот, ми ги пренесоа неговите пораки, па јас одговорив“, изјави Вучиќ пред новинарите во Брисел.
На прашањето што е спорно, зошто премиерот на Косово ја одби билатералната средба, Вучиќ одговори: „Ништо, не сака човекот да ме види“.
