Напад со дрон во Москва
Во Москва, напад со беспилотно летало утрово предизвика мала штета на неколку згради, изјави градоначалникот на руската престолнина Сергеј Собјанин, цитиран од Би-Би-Си. Тој додаде дека на терен се сите служби за итна помош во градот.
„Рано утринава напад со дрон предизвика мала материјална штета на неколку згради. Сите служби за итни случаи во градот се на терен“, се вели во соопштението.
Градоначалникот на Москва нагласи дека никој не е сериозно повреден во инцидентот, а итните служби ги разјаснуваат околностите околу тоа што се случило.
Собјанин ги повика луѓето да им веруваат само на официјални извори и да не шират непроверени информации.
Неколку беспилотни летала биле соборени додека се приближувале кон Москва, објави на социјалната мрежа Телеграм гувернерот на Московската област Андреј Воробјов.
Според извештаите на локалните медиуми, околу 10 беспилотни летала биле соборени над градот, главно во областите Истра, Красногорск и Одинцово.
Нападите на Москва се случија по уште една ноќ на напади со беспилотни летала врз главниот град на Украина.
