Наместо најавените 7: Македонците за патување во ЕУ ќе плаќаат 20 евра!
Европската комисија најави дека новиот систем за авторизација за патување во ЕУ – ETIAS, ќе започне со примена во последниот квартал од 2026 година, со такса од 20 евра наместо првично планираните 7 евра.
Станува збор за задолжителна електронска дозвола за сите државјани на земји кои патуваат во ЕУ без виза, вклучително и граѓаните на Македонија. ETIAS дозволата ќе важи три години и ќе може да се добие по онлајн аплицирање, со важечки пасош и платежна картичка.
Зголемувањето на цената, според Европската комисија, е поради инфлацијата од 2018 година и дополнителните трошоци за нови технички функционалности.
Пред воведувањето на ETIAS, од октомври 2025 година ќе стартува системот за влез/излез (EES), кој нема да се наплаќа. Тој ќе се применува на надворешните граници на 29 европски земји, со задолжително прибирање биометриски податоци – фотографија и отпечатоци од прсти. Одбивањето да се дадат овие податоци ќе значи забрана за влез.
