Намален бројот на ученици и студенти во домовите – пад од 15 проценти
Во учебната 2024/2025 година, во домовите и интернатите во Северна Македонија биле сместени вкупно 4.889 ученици и студенти, што претставува намалување од 15 проценти во споредба со претходната учебна 2023/2024 година, покажуваат податоците на Државниот завод за статистика.
Од вкупниот број сместени лица, најголем дел се студенти – 3.144. Во ученичките домови биле сместени 1.745 ученици, од кои 52 од основно образование и 1.693 од средно образование. Дополнително, 129 ученици биле сместени во домови за средни верски училишта, меѓу кои 35 од православни и 94 од исламски верски училишта.
Во учебната година функционирале вкупно 10 студентски домови и 19 домови за ученици од основните, средните и средните верски училишта. Домовите обезбедуваат сместување, исхрана и воспитно-образовна грижа за учениците и студентите кои за време на школувањето престојуваат надвор од местото на живеење на своите родители или издржувачи.
Споредбата со претходните години покажува варирање во бројот на сместени лица. Во учебната 2022/2023 година во домовите биле сместени 5.877 ученици и студенти, додека во 2021/2022 година 5.516 лица.
Податоците укажуваат на континуиран пад во бројот на сместени ученици и студенти во последната учебна година, при што најголемиот дел од капацитетите и натаму ги користат студентите.
