НАДМИНАТИ ПЛАНИРАНИТЕ ЗАШТЕДИ:Земјите од ЕУ ја намалија потрошувачката на гас за 18 отсто

Земјите од Европската унија ја намалија потрошувачката на гас оваа зима за 18 отсто, со што ги надминаа планираните заштеди од 15 отсто во најстудените месеци, пишува магазинот „Недеља“, на Националниот нафтен комитет на Србија, повикувајќи се на агенцијата Ројтерс.

Вкупната потрошувачка на гас во 27-те земји на Европската унија е намалена за 17,7 отсто од август до март, во споредба со петгодишниот просек за истиот период, покажуваат податоците објавени од статистичкиот завод на ЕУ Еуростат.

Минатата година земјите од ЕУ поставија доброволна цел да ја намалат потрошувачката на гас за 15 отсто од август до март. Целта беше една од бројните итни мерки на ЕУ усвоени по прекинот на испораките на руски гас по воената интервенција во Украина во февруари 2022 година и нерешеното минирање на гасоводот Северен тек во септември истата година.

Повеќето земји од ЕУ ја исполнија целта од 15 проценти, а сите освен Малта ја намалија употребата на гас во тој период, најмногу благодарение на релативно топлата зима.