На ТФТ не му стигнаа ни +16 и е сѐ подалеку од плејофот
Поранешниот освојувач на Купот на Македонија загуби од Подгорица со 83-88 и покрај тоа што во втората четвртина доминираше и имаше голема предност. Највисоката изнесуваше 16 поени разлика (45-29) која, за жал, нашиот тим не успеа да ја задржи и искористи за триумф.
До крајот на полувремето и на почетокот на третата четвртина Подгорица направи серија од 15-0 и се доближи на само еден поен негатива за подоцна и да ја преземе контролата над резултатот и да поведе со 60-56. И покрај тоа, ТФТ остана конкурентен, во последната четвртина водеше со 73-70 и со 76-74, но не ја издржа серијата од 10-3 на Подгорица во финишот која се покажа клучна за конечниот исход.
Луис со 19 поени беше прв стрелец на ТФТ, а Зафиров постигна 17 со пет тројки од седум шута. Сепак, убедливо најдобар играч на мечот беше противничкиот кошаркар Марко Кљајевиќ кој реализира 29 поени и индекс 33.
