Најстудено во Берово и на Попова Шапка, измерени минус два степени

Минималните утрински температури низ земјава се спуштија под нулата во Берово и на Попова Шапка, каде што беа измерени -2 степени, додека во Тетово беа регистрирани -1 степен. Температури од 1 степен се измерени во Крива Паланка, Битола, Кавадарци, Струмица, Крушево и Лазарополе. Во Скопје, на мерните станици Петровец и Зајчев Рид, како и во Прилеп, Штип, Демир Капија и на Маврови Анови, утринската температура изнесуваше 2 степени, додека во Охрид, Претор, Виница и Велес беа измерени 3 степени. Најтопло утрово беше во Гевгелија со 4 степени.

Во изминатите 24 часа до 7 часот, најмногу врнежи се регистрирани во Охрид, каде наврнаа 5 литри на метар квадратен. По 2 литри на метар квадратен се измерени во Крива Паланка, Штип, Виница и на Попова Шапка, додека по 1 литар на метар квадратен се регистрирани во Гевгелија, Пожаране, Маврови Анови, Лазарополе и Пожар-Радовиш.

Времето денеска ќе биде променливо облачно, а во утринските часови по одделни котлини се очекува појава на магла. Во текот на денот ќе преовладува облачно време со повремени локални врнежи од дожд, поинтензивни во западните делови, каде на места може да наврнат над 15 литри на метар квадратен. На планините врнежите ќе бидат од дожд и снег. Ќе дува слаб до умерен ветер од јужен правец.

Максималната дневна температура ќе се движи во интервал од 7 до 13 степени. Во Скопје времето ќе биде променливо облачно, претпладне со појава на магла во делови од котлината, а од пладневните часови се очекуваат повремени врнежи од дожд. Максималната температура во главниот град ќе достигне до 9 степени.