На полноќ истекува рокот за потписи за независни кандидатури: Досега 22 кандидати за градоначалници и 12 листи за советници
На полноќ истекува рокот за собирање потписи за независни кандидатури за претстојните Локални избори 2025, кои ќе се одржат на 19 октомври.
Според податоците од Државната изборна комисија (ДИК), до саботата потписи за кандидати за градоначалници се собираа во 16 општини за вкупно 22 кандидати, додека за листи за членови на советот во 11 општини беа активни 12 кандидатури.
Потписи за градоначалници се собираа во: Македонска Каменица (двајца кандидати), Куманово, Дебарца, Охрид, Струга, Дебар, Центар, Демир Капија, Македонски Брод, Кочани, Битола (двајца кандидати), Могила, Новаци (двајца кандидати), Гостивар, Демир Хисар (четворица кандидати) и за Градот Скопје.
За листи на советници потписи се собираа во: Македонски Брод, Кочани, Чешиново-Облешево, Битола (две листи), Могила, Свети Николе, Лозово, Карпош, Дебар, Куманово и Старо Нагоричане.
Рокот за поднесување на листи за кандидати за градоначалници и советници истекува на 13 септември. До 11 септември граѓаните можат да извршат увид во Избирачкиот список во подрачните канцеларии и одделенија на ДИК. Во тек е и процесот на пријавување за набљудување и известување од изборите.
