Најмалку 52 лица загинаа во експлозија на прославата на роденденот на пророкот Мухамед во Пакистан
Најмалку 52 лица загинаа, а околу 70 се ранети денеска во југозападен Пакистан кога бомба експлодираше меѓу стотици луѓе кои го славеа роденденот на исламскиот пророк Мухамед, соопштија властите.
Еден од најсмртоносните напади во Пакистан во последните години беше извршен во областа Мастунг во провинцијата Белуџистан, каде бунтовниците претходно извршија бројни напади.
Меѓутоа, екстремистите обично ги таргетираат безбедносните сили, а не цивилите. Пакистанските талибанци постојано тврдеа дека не напаѓаат верски објекти и цивили.
Околу 500 луѓе се собраа во Мастунг на поворка по повод роденденот на пророкот Мухамед, национален празник во Пакистан познат по собирањето верници и делењето бесплатни оброци.
Полицијата соопшти дека истражува дали експлозијата била самоубиствен напад.
Бомбашкиот напад се случи неколку дена откако властите побараа од полицијата да остане во максимална готовност, велејќи дека екстремистите би можеле да ги нападнат собирите по повод роденденот на пророкот Мухамед.
Денеска, исто така, одекна експлозија во џамија во близина на полициската станица во областа Хангу, во северозападната провинција Хајбер Пахтунхва, каде што најмалку две лица загинаа, а седум се ранети. Во моментот на нападот, во џамијата се молеле околу 40 луѓе, главно полицајци.
Се уште никој не ја презел одговорноста за нападите, а пакистанските талибанци негираат вмешаност.
Екстремистичката група Исламска држава ја презеде одговорноста за претходните смртоносни напади во Белучистан и други провинции.
