Најмалку 19 лица загинаа во смртоносните бури во САД

Најмалку 19 лица загинаа откако торнада и силно невреме ги погодија централните и јужните делови на САД, јавува Би-Би-Си.

Најсериозно е погодена државата Мисури, со 11 жртви досега.

Три лица загинаа во сообраќајна несреќа за време на силна песочна бура во Тексас, а жртви имаше и во Оклахома и Арканзас.

Повеќе од 200.000 луѓе се без струја во 5 држави – Мисури, Илиноис, Индијана, Тексас и Арканзас, според податоците на PowerOutage.

Посилно време се очекува во регионот во сабота, со предупредување за торнадо во централниот дел на Мисисипи, источна Луизијана и западниот дел на Тенеси.

Во тие 3 држави, како и делови од Алабама и Арканзас, издадени се и предупредувања за поројни поплави, бидејќи невремето продолжува да се движи низ југоисточниот дел на земјата.

Највисоко ниво на предупредување за торнадо беше издадено и во центарот на Мисисипи во саботата наутро.

Националната метеоролошка служба (NWS) предупреди на „повеќе интензивни до исклучително силни торнада со долги патеки“ во овие области, опишувајќи ја ситуацијата како особено опасна.