НАЈЛОШОТО ДОПРВА ДОАЃА: Надојдената река се излеа од коритата, вистински хаос во Словенија и Хрватска
Во Словенија денеска е во сила црвен метео аларм поради поплави во поголем дел од земјата, со исклучок на Приморска на запад.
Межишката долина и делови од Горња Савињска и понатаму се отсечени, а состојбата е катастрофална и во областа Медвод, јави Радио-телевизија Словенија.
Во поширокото подрачје на Камник, полицискиот хеликоптер, како и припадници на полицијата помагаат во евакуацијата на населението.
Условите во Медводе се катастрофални, а луѓето се заробени поради лизгање на земјиштето, рече градоначалникот на градот, Нејц Моле.
Во Словенија се излеа реката Сава
Сава се излеа на устието на Крка кај Брежице, соопштија од штабот на Граѓанската одбрана на Посавје.
Врнежите во текот на ноќта доведоа до ново покачување на нивото на реките во централна и источна Словенија.
Пешница и Дравиња се излеале во долниот тек, Сава во среден и долен тек, како и одредени притоки на Љубљаница.
Поради високиот водостој на Сава, кампот во Чатешки Топлице е евакуиран во текот на ноќта, а Чрна во Корушка е отсечена од светот, јави Радио-телевизија Словенија.
Во општините Брежице и Кршко пожарникарите поставија кеси за заштита од поплави.
Сава веќе во петокот вечерта го поплави помошното фудбалско игралиште во Кршко.
Словенечката армија тргнува кон Черна во Корушка, каде што луѓето се без вода, струја или сигнал од мобилен телефон.
Во Словенија три лица загинаа како последица на невреме и поплави.
Слична ситуација во Хрватска
Нивото на водата низ Хрватска е во благ пораст и покрај бранот вода кој пристигна и се уште пристигнува од Словенија. Редовни мерки за заштита од поплави се на сила низ државата, а на места се и подготвителни. Само во Дрење Брдовечки е вонредна состојба.
Бранот од Словенија вчера најпрво зафати делови од жупанија Меѓумурје и Вараждин.
Протокот на Сава вечерва треба да биде рекорден, пренесува Index.hr.
Најзагрозени подрачја се населбите Дрење Брдовечко, Зденци Брдовечко, Пруднице, Јаворје. На подрачјето на Самобор, Света Неџеља, Запрешиќ и Брдовац во текот на ноќта се спроведуваа активности за заштита од поплави, а патроли беа организирани и по одводниот канал Сава-Одра. Континуирано се посетуваат критичните места на теренот.
Како што јави ХРТ Сава почна да се излева, загрозени се најниските делови на општина Брдовец.
