На Крмзов му е одземен пасошот, доказите за малверзации собрани во два камиона
Скопскиот Кривичен суд определи мерки за претпазливост за едно од лицата кои беа задржани во полициска станица во акцијата за даночни измами и малверзации. Според информациите се работи за струмичкиот бизнисмен Ристо Крмзов на кој му е одземен пасошот.
Државниот обвинител Љупчо Коцевски во телевизиско интервју на националниот сервис оценувајќи ја акцијата за успешна рече дека се обезбедени докази и документација која ќе биде предмет на анализа.
-Акцијата беше успешна. Се прибавија одредени материјални докази и се прибавија одредени компјутерски материјали. Сослушани се три лица пред јавниот обвинител со што за едно лице се предложени мерки за пратпазливост за одземање на патната исправа и за јавување во судот, изјави јавниот обвинител Љупчо Коцевски.
Во четвртокот вечерта полицијата заедно со УЈП и Царина изврши претреси на повеќе локации во Струмица, Скопје и Гостивар. При претресот на фирмите и објектите на Крмзов во Струмица биле пронајдени дијаманти, а кај магационер на една од неговите фирми во Скопје поголема сума на пари во кеш. Според информациите и вчера имало претреси во други два магацини на Крмзов.
Едно од главните дела кои им се става на товар на лицата под истрага е фиктивниот поврат на ДДВ и оштетувањето на државната каса. Според написите во медиумите, извадени се два камиона доказен материјал, а само во еден случај тие прикажале 880 милиони денари за поврат на ДДВ, односно 14 милиони евра.Истрагата открила дека биле регистрирани фирми и на косовски државјани со измислени имиња, кои не постојат во базата на податоци, за да се забошоти криминалот.
Според некои медиуми, можно е акцијата да се прошири и кон поранешни носители на државни институции, како поранешната директорка на УЈП, Сања Лукаревска и директорката на Централниот регистар.
