Наќе Чулев по судската победа: Oдземањето на безбедносниот сертификат и моето отпуштање биле незаконски и политички мотивирани!
Поранешниот министер за внатрешни работи и екс-директор на Агенцијата за разузнавање, Наќе Чулев, со емотивно обраќање до јавноста потврди дека по долга судска битка, правдата е конечно задоволена.
Судовите во Македонија донеле пресуди со кои се утврдува дека неговото отпуштање од работа и одземањето на безбедносниот сертификат од страна на претходната власт биле незаконски и политички мотивирани.
Чулев открива дека со години бил цел на организирана кампања за дезинформации и силен политички прогон, што резултирало со јавно понижување и притисоци врз неговото семејство. Тој потенцира дека по 25 години чесна служба во безбедносниот сектор, бил прогласен за безбедносен ризик не поради сторено дело, туку како одмазда за неговото јавно говорење против корупцијата и аномалиите во системот.
Во своето соопштение, тој информира дека веќе е поднесена кривична пријава против лицата одговорни за злоупотреба на институциите во неговиот случај и очекува соодветна одговорност. Чулев нагласува дека оваа победа не ја доживува како можност за одмазда, туку како доказ дека професионалниот интегритет и достоинството не можат да бидат скршени со политички одлуки.
Поранешниот министер упати благодарност до семејството и пријателите кои му дале поддршка во најтешките моменти и порача дека неговата борба продолжува, но сега насочена кон градење општество во кое институциите никогаш повеќе нема да бидат алатка за политички пресметки.
