НАЈДОА НАЧИН КАКО ДА ГИ ЗАОБИКОЛУВААТ САНКЦИИТЕ: Русите користат криптовалути во трговијата со Кина и Индија

Русија користи криптовалути во трговијата со нафта со Кина и
Индија за да ги заобиколи западните санкции, наведуваат четири извори со директно познавање на практиката,
пренесува Ројтерс. Иако јавно ја охрабри употребата на криптовалути и минатото
лето донесе закон со кој се дозволува плаќање во дигитални валути во
меѓународната трговија, нивната употреба во трговијата со нафта досега не е
позната.

Некои руски нафтени компании користат биткоин, етер и
стабилни коини како Тетер за да ја олеснат конверзијата на кинески јуани и
индиски рупии во руски рубљи, велат изворите. Тие додадоа дека ова сè уште
сочинува мал, но растечки дел од вкупната руска трговија со нафта, која
минатата година беше вредна 192 милијарди долари според Меѓународната агенција
за енергија.

Криптовалутите веќе им помогнаа на земјите под американски
санкции, како Иран и Венецуела, да ги одржат своите економии и да избегнат
користење на доларот, кој е доминантна валута во глобалната трговија со нафта.

Русија се сврте кон овој метод откако Венецуела ја забрза
употребата на дигитални валути за извоз на сурова нафта и гориво откако
Вашингтон повторно ги воведе санкциите.

Русија има воспоставено различни системи за плаќање, а USDT
(Tether) е само еден од нив, вели
изворот на Ројтерс, кој е истражувач во фирма што ја следи употребата на криптовалути за
избегнување санкции. Еден извор верува дека Русија ќе продолжи да користи
криптовалути во трговијата со нафта дури и ако се укинат санкциите и доларот
стане повторно достапен.

„Тоа е практична алатка и овозможува побрз бизнис“, додаде
тој. Аналитичарите велат дека традиционалните валути сè уште го сочинуваат
најголемиот дел од трансакциите на руската нафта, при што се користат и други
методи, како што се плаќањата во дирхами на ОАЕ.