МЗТ со пеколна последна четвртина ја освои Гевгелија за плејоф-полуфинале!
Гевгеличани одново му покажаа заби на шампионот, а овој пат, за разлика од првиот меч кога беа рамноправни само во првото полувреме, дури во три четвртини беа во игра за да го изненадат пореномираниот противник. Но, на крајот пресуди поголемото искуство на аеродромци, кои прво со осум поени во низа направија резултатски пресврт во финишот од третиот и почетокот на последниот период (71-65) за потоа со серија 16-2 да дојдат до највисоки плус 17 (91-74) како потврда на триумфот.
Војдан Стојановски со 25 поени и Бојан Крстевски со 23 поени и осум скока беа најдобри кај МЗТ Скопје, додека Мајрон Гордон со 21 поен, седум скока и пет асистенции и Горан Главчев со 15 поени беа најдобри кај Кожув.
Противник на актуелниот шампион во полуфиналето ќе биде подобриот од дуелот помеѓу Гостивар и Работнички (1-0), во кој втората средба се игра утре. Претходно денеска, ТФТ го освои Кавадарци (76-72) и се избори за „мајсторка“ во пресметката со Еуро Никел, а вечерва играат уште Феникс и Пелистер (0-1).
