МЗТ доцна се разбуди: Работнички по 1.010 дена конечно победи во вечното дерби (ФОТО)

Ова беше прв триумф на центарци по низата од девет порази по ред, односно по пауза од дури 1.010 дена (претходно триумфираа во април 2021 година), нешто што досега им се нема случено против ниту еден тим во макбаскетот. Црвено-белите апсолутно заслужено дојдоа до триумфот, со оглед што доминираа во повеќе од три четвртини. Избраниците на тренерот Горан Самарџиев на стартот од последниот период дојдоа до највисоки плус 21 (82-61) што како премногу да ги опушти, што „металците“ го искористија и со серија 20-6 прво намалија на минус седум (81-88), а потоа и на минус пет, кога Ејасу Ворку направи две големи грешки да го донесе својот тим само на еден посад разлика. Времето немилосрдно течеше за шампионот, па најмногу што можеа да сторат е да дојдат на поен до ривалот, но Дамјан Робев го промаши последниот шут за тројка.

Квентон Декоси со 23 поени и осум скока и Стојан Ѓуроски со 20 поени беа најпрецизни во победничкиот тим, додека Душан Танасковиќ со 26 поени беше убедливо најдобар во таборот на аеродромци. Составот од скопската населба Центар со 12 тројки го торпедира ривалот и тоа со речиси 50-отстотна прецизнот, а беше и далеку понадмоќен во скокот со дури 14 фатени топки повеќе под обрачите (39-24)

За Работнички ова беше петти по ред триумф во Првата лига со кој барем привремено се искачи на втората позиција на табелата со скор 11-4, веднаш зад МЗТ кој има учинок 12-3 по вториот во низа неуспех во новата година, откако пред неколку дена дома загуби и од Пелистер.