МВР отвори предмет за деца кои биле носени на средби со политичари – од Бугарија се јавија со жестоки реакции…
Mинистерот за внатрешни работи Оливер Спасовски вчера во изјава за медиумите откри дека полицијата отворила предмет за Детското ликовно студио „Кирил и Методиј“, организатор на колонијата „Мал битолски Монмартр“ поради носењето ученици кај бугарски политичари.
Имено, по пишувањето на медиумите дека ова студио врши политичка злоупотреба на деца носејќи ги во Бугарија на средба со бугарски политичари, полицијата по допрен глас доставила известување до Основното јавно обвинителство (ОЈО) за случајот.
„Ниту еден родител, нити Меѓаши или друга огранизација нема доставено кривична пријава. По доставувањето на известувањето веќе имаме предмет. Апелирам и за овој и за друг случај да се достават кривични пријави, да се земат изјави на записник во однос на овие случаји за да можат и институциите да постапуваат. Не треба да ги отвораме предметите само по допрен глас. Доколку има некаква злоупотреба тоа да се пријавува, за да можеме да постапуваме“, вели Спасовски.
На ова реагираа и од соседна Бугарија.
Лидерот на бугарската политичка партија Преродба, Костадин Костадинов побара бугарското Министерство за надворешни работи да го осуди, како што се наведува, тоа што се случува во Битола.
„По налог на министерот за внатрешни работи на Северна Македонија, Оливер Спасовски, почна судскиот процес против 32 деца на возраст под 14 години, кои од вчера се на распит во Обвинителството. Овие репресии врз децата не се изолирана појава, туку банална практика во последните години. Зачестија особено од минатата година кога беше укинато ветото против членството на РСМ во ЕУ. Тогаш Бугарија ги охрабри сите антибугарски акции“, вели Костадинов.
И поранешната шефица на бугарската дипломатија и актуелна пратеничка, Екатерина Захариева, реагираше и истакна дека „достигнато е ново дно“.
„Владата на Северна Македонија достигна ново најниско ниво: Министерот за внатрешни работи Оливер Спасовски и нареди на полицијата да започне предистражна постапка против наставник затоа што носеше деца да сликаат во Бугарија – пред Народниот театар и во Пловдив, а потоа ги посети бугарскиот парламент и претседателството. Не знам дали колегите разбираат како изгледа ова – како да прават очајнички потези да се приклучат на многу познат светски клуб. Не, не се работи за Европската Унија. И за клубот на тоталитарните режими што се намалува.
Всушност, можам само да помислам на наставник кој полицијата го гони за такво дело во Русија, Белорусија и Северна Кореја. И сите мислевме дека ја затворивме оваа темна страница на историјата на Балканот. Патетично, тажно, грдo и апсурдно!“, напиша Захариева.
