Муртезани: Се зголемува револтот во АА, ќе продолжи трендот на напуштања
Незадоволството кај поддржувачите и функционерите на Алијанса за Албанците би можело да предизвика нови напуштања од партијата, смета министерот за европски прашања Орхан Муртезани од редовите на ВЛЕН. Тој истакна дека по одлуката на лидерот Арбен Таравари да премине во опозиција, се зголемува револтот кај членовите, што, според него, ќе резултира со продолжување на трендот на напуштања.
-Мислам дека сите овие случувања во делот на АА предводена од Таравари, се знак дека одлучноста на структурите таму и подготвеноста е многу поголема да не завршат во прегратките на Али Ахмети, од калкулациите на Таравари. Според наши неофицијални информации, тие ќе продолжат. Револтот кај сите поддржувачи, симпатизери и функционери таму е многу голем. Така што, чекаме наредниве денови, мислам дека тој тренд ќе продолжи, рече Муртезани прашан дали има најави други пратеници да го напуштаат Таравари.
По одлуката на Таравари за напуштањето на власта, деновиве пратеникот од редовите на АА, Салим Сулејмани, објави дека поднесува оставка од сите партиски функции и од функцијата пратеник во Собранието.
