Мурал во Австралија за исчезнатата македонка Гордана Котевски – сè уште важи наградата од 1 милион долари за информации
На ѕидот на трговскиот центар во Кардиф, Нов Јужен Велс, Австралија, беше откриен 26-метарски мурал посветен на Гордана Котевски – македонката која исчезна во 1994 година на 16-годишна возраст. И покрај поминати 30 години, надежта не згаснува – и понатаму е активна награда од 1 милион австралиски долари за информации што би довеле до апсење и осуда на одговорниот за нејзиното исчезнување.
Гордана беше последен пат видена во Чарлстаун, како насилно била внесена во автомобил додека одевала кон домот на нејзината тетка, по посетата на шопинг-центарот.
Нејзината мајка, Пеги Котевски, со мешавина од тага и благодарност присуствуваше на откривањето на муралот.
„Прекрасен е муралот, но за една мајка, ова е тежок ден. Би сакала да ја имам во живо, а не на ѕид,“ изјави Пеги. „Минати се 30 години, но за нас тоа беше како вчера. Никогаш не се преболува.“
Сестрaта на Гордана, Каролина, исто така ја посети локацијата и откри дека со години ја поврзува сеќавањето на нејзината сестра со појавата на пеперутки.
„Секојпат кога мислев на неа или кажував тивка молитва, некако се појавуваше пеперутка. Затоа тие се дел од муралот,“ рече Каролина.
Муралот, кој беше финансиран преку заедницата, го наслика уметникот Рубен „Рубз“ Ботвуд во соработка со семејството. Тој истакна дека му е чест да работи на вакви емотивни проекти кои имаат значење за локалната заедница.
Полицијата од Нов Јужен Велс продолжува да работи на случајот преку специјалната истражна единица „Strike Force Arapaima“, основана во 2019 година. Истрагата ги опфаќа и исчезнувањата на уште две девојчиња од областа Лејк Маквари, кои исчезнале во истиот период.
„Сè уште има пет детективи кои работат на случајот. Се надевам дека некој ќе има храброст да проговори ако знае нешто. Сè уште важи понудата за награда,“ вели Пеги.
Семејството останува благодарно на сите кои придонесоа за создавањето на муралот – како симбол на љубов, надеж и борбата за вистината што трае веќе три децении.
