Муцунски и Саар разговараа за продлабочување на билатералните односи помеѓу Македонија и Израел
Министерот за надворешни работи и надворешна трговија, Тимчо Муцунски, денес оствари телефонски разговор со својот израелски колега, министерот за надворешни работи на Државата Израел, Гидеон Саар. Разговорот се фокусираше на актуелните регионални и глобални состојби, како и на потенцијалот за продлабочување на билатералните односи меѓу Македонија и Израел.
Министерот Муцунски му честита на г-дин Саар за неговиот избор за министер за надворешни работи на Израел и изрази желба за успешна и плодна соработка. Тој истакна дека Израел се наоѓа во предизвикувачки период, додека министрите се согласија дека меѓусебната комуникација и соработка ќе бидат од клучно значење за продлабочување на односите меѓу двете земји.
Тимчо Муцунски го поздрави неодамнешниот договор за ослободување на заложниците и прекинот на огнот во Газа, што го смета за важен хуманитарен чекор напред. Овој договор, според Муцунски, претставува можност за воспоставување долгорочен мир во регионот.
Министерите исто така разговараа за можностите за зголемување на економската, технолошката и научната соработка помеѓу Македонија и Израел. Потенциран беше интересот за размена на искуства и знаења во области како што се образование, здравство, земјоделство, стартап екосистеми, технологија, туризам и култура.
Министерот Муцунски го информираше својот израелски колега за одбележувањето на Меѓународниот ден на сеќавање на Холокаустот во Министерството за надворешни работи и надворешна трговија, нагласувајќи ја важноста на почитта кон еврејската заедница и нејзиното наследство во нашата земја.
На крајот од разговорот, двата министри се согласија да продолжат со блиска и конструктивна комуникација и соработка во интерес на двете земји.
